您现在的位置是:首页 > NBA直播 > 睇史杜列治表演 紅軍地獄賽程 

睇史杜列治表演 紅軍地獄賽程 

时间:2018-10-04 10:56:14  来源:  阅读次数: 复制分享 我要评论

歐聯C組重頭戲,意甲代表拿玻里主場鬥英超「紅軍」利物浦。「紅軍」承接英超開季強勢,首場分組賽主場以3比2擊敗「億萬大軍」巴黎聖日耳門;相反拿玻里上場只能悶和同組最弱嘅貝爾格萊德紅星,士氣此消彼長,加上拿玻里近5次喺歐聯面對英超球隊法定時間輸4次,加上史杜列治連續2場入靚波,有力反客為主。(Now 644、有線662及602台周四凌晨3時直播)

被喻為戰鬥力近年最強嘅利物浦今季銳不可當,上場聯賽作客以1比1逼和車路士,頭7輪聯賽6勝1和,繼續保持強勁走勢。「紅軍」首場分組賽面對爭標熱門之一嘅PSG,一度領先2球下被追和2比2,但憑住後備上陣嘅羅拔圖法明奴補時絕殺以3比2險勝。


最難得係依家「紅軍」無論正選、後備都咁弗,好似史杜列治上場對車仔落場冇耐,即射入世界波助球隊搶番1分,以目前勢頭絕對有力擊敗任何球隊。


拿玻里今季由新教頭安察洛堤領軍,整體成績只算不過不失,除咗聯賽曾經作客森多利亞以大比數0比3落敗,上場聯賽亦以1比3不敵爭標勁敵祖雲達斯,今屆歐聯首場分組賽面對弱旅貝爾格萊德紅星亦只能悶和0比0,表現令人失望。


兩軍季前曾喺晏菲路進行熱身賽,當時「紅軍」大勝5比0,今次雖然主客互調,不過拿玻里近5次喺歐聯對英超球隊法定時間輸咗4次,包括上屆分組賽被曼城主、客「雙殺」,以拿玻里現時狀態及質素難有突破性演出,「紅軍」可以睇高一線。